fbpx

Pintar-Pintar abre’l so nuevu espaciu nel corazón d’Uviéu

El llocal dará cabida a les publicaciones de la editorial y del restu de sellos integraos nel Gremiu d’Editores d’Asturies / Gremio de Editores de Asturias

Tamién contará con espaciu enforma p’agospiar presentaciones, cuentacuentos o talleres, aparte d’artículos con diseños de diferentes ilustradores

Pablo Fraile Dorado | Uviéu, 2 de payares del 2021

La editorial Pintar-Pintar abrirá’l so nuevu espaciu nel corazón d’Uviéu, el sábadu 20 de payares, y dará abellugu a publicaciones propies y del restu de sellos integraos nel Gremiu d’Editores d’Asturies / Gremio de Editores de Asturias. El llocal, asitiáu na plaza Xuan XXIII, a dos minutos de la catedral y del Muséu de Belles Artes, contará con espaciu enforma p’agospiar presentaciones, cuentacuentos o talleres, amás d’artículos con diseños de diferentes ilustradores.

El llocal nuevu, Pintar-Pintar – Libros, colores y Lletres Asturianes, naz cola idea de convertise en puntu d’alcuentru pa los amantes de la cultura —y los llibros en particular—, y dará cabida a obres espublizaes por editoriales de casa: sellos independientes con catálogos de gran calidá y con autores, en munchos casos, nacíos n’Asturies y qu’escriben n’asturianu, castellán o dambes llingües.

Entrugada poles novedaes sobro’l llocal, Ester Sánchez, editora de Pintar-Pintar, respuende mui ilusionada. «Hai una importante y allegre novedá depués de reunimos colos nuesos colegues del Gremiu d’Editores d’Asturies, y ye que l’espaciu dará cabida a les editoriales del gremiu», esplica.

Cola so distribución en forma de «L», el nuevu llocal va agospiar talleres, presentaciones, cuentacuentos y otres actividaes na so parte más llarga, un espaciu que podrá adautase según seyan les necesidaes, mientres que la parte más curtia va dir destinada a l’actividá comercial.

Enriba los escaparates yá llucen carteles grandes de vinilu col nome’l llocal, a dambos llaos de la entrada, y col llogotipu del Gremiu d’Editores d’Asturies —orientáu a la plaza Porlier, llugar de tránsitu de turistes y pasiantes—. «Esi escaparate, pelo menos, tendrá siempre les publicaciones de los agremiaos», diz Ester Sánchez. «Nel restu va haber sitiu pa les nueses publicaciones, llámines d’ilustradores, tazes, camisetes y inclusive los dibuxos infantiles de los talleres que vayamos impartiendo».

Ye fácil imaxinar los llibros de Pintar-Pintar tras les llunes, un sombreru que vuela, un poema cayíu a la mar, una neña qu’echa andar la motosierra o un ratón perraru que papa les pallabres. Tamién nomes d’autores como Daniel García Granda, Berta Piñán, María Rosa Serdio, Vicente García Oliva, José Carlos Román o Carmen Gómez Ojea, lligaos a los d’ilustradores como Antonio Acebal, Blanca BK, Elena Fernández, Mónica Carretero, Ilemi Cuesta Mier o la propia Ester Sánchez.

Tampoco cuesta imaxinar, de cara a Porlier, los llibros de Pez de Plata, Trabe, BaxAmar o Delallama, por citar dalgunos sellos del gremiu, con autores como Leticia Sánchez Ruiz, Ignacio González, Carolina Sarmiento, Xandru Martino Ruz o Xuan Bello. Nin l’actividá d’un fin de selmana, tres los llibros, colos neños y neñes nun taller d’espresión plástica o entamando una visita al muséu.

«Diremos espublizando la rellación de talleres infantiles na nuesa páxina web, pa facer posible la reserva online, aparte de na tienda», esplica Ester Sánchez. «Un poco como funcionábemos cuando xestionábemos l’espaciu-tienda del Centru Niemeyer [del añu 2014 al 2020]. En cuanto al conteníu de les nueses actividaes, pensamos contar con autores de LLIX, ilustradores, visites-taller al Muséu de Belles Artes o al Arqueolóxicu o talleres d’espresión plástica (pintar, modelar, etcétera). Hai una placa xunto a la puerta que tendrá’l QR cola axenda de talleres, onde tamién apaecerán toles actividaes y presentaciones que desarrollemos ellí», añade la editora.

Llibros, colores y lletres

Depués de pensar muncho, Ester dio col nome ideal pal nuevu espaciu, que ye a la vez llibrería, tienda y taller. «El nome sí que foi un dolor de tiesta», esplica, «pero, al fin y al cabu, conócennos como Pintar-Pintar, asina que tiré per ehí. Apaecerá «Pintar-Pintar – Libros, colores y Lletres Asturianes». Esti nome yá vien d’atrás. Nel 2009, darréu del Premiu Nacional d’Edición por ¿Cómo se hacen los libros?, l’Ayuntamientu d’Uviéu preparó una esposición coles nueses publicaciones, en castellán y n’asturianu, nel Café Español. La esposición, que foi un ésitu, titulóse Llibros, colores y lletres», reflexando l’actividá del sellu.

«Libros» alude al nuesu llabor editorial; «colores« ye un términu más ampliu, onde entren los álbumes infantiles ilustraos, pero tamién toles actividaes y los talleres educativos que facemos; «Lletres Asturianes», porque sofitamos la cultura y la llingua asturianes y queremos da-yos visibilidá, non solo de cara a los propios asturianos y asturianes, sinón tamién a los turistas: mientres la nuesa estancia nel Centru Niemeyer, xestionando l’espaciu-tienda, ablucónos la cantidá de turistes que, encantaos, decidíen llevar como recuerdu, non un imán o una semeya, sinón un llibru n’asturianu. Y ye que quiciás dende fuera les cosas vense más clares y ensin tantu prexuiciu. En resume, queremos un espaciu abiertu a diferentes iniciatives que puean surdir. La nuesa idea ye dir espoxigando y ampliando poquitín a poco. Y nun sé qué más contate… Que da too munchu vértigu, pero tamién ye ilusionante», termina.

Pintar-Pintar nació nel 2005 col propósitu d’imaxinar y editar llibros ilustraos, pensaos pa neñes y neños pero tamién pa mayores ainda abiertos a la Lliteratura Infantil y Xuvenil. La editorial, asina mesmo, xestiona actividaes educatives p’aniciar a los más pequeños nel conocimientu y disfrute del arte. El llabor editorial de Pintar-Pintar foi reconocíu, ente otros gallardones, col Premiu Nacional a la Edición de los años 2007, 2012 y 2014. Durante más d’un llustru, y hasta xunetu del 2020, xestionó un espacio cultural semeyante nel Centru Niemeyer, Avilés. El día 20 principia la so nueva etapa n’Uviéu.


    Pintar-Pintar – Libros, colores y Lletres Asturianes abrirá de martes a domingu (dambos díes incluyíos)
n’horariu de 10 a 13.30 y de 16.30 a 20.00 hores, anque sedrá flexible en casu de presentaciones y otres actividaes.
El llocal solamente permanecerá peslláu los llunes. 

Editorial española especializada en literatura infantil y juvenil.
Entradas creadas 784

Deja un comentario

Este sitio usa Akismet para reducir el spam. Aprende cómo se procesan los datos de tus comentarios.

Comienza escribiendo tu búsqueda y pulsa enter para buscar. Presiona ESC para cancelar.

Volver arriba