Y de repente marchó la lluz… de la lluna

TESTOS: Xavier Frías Conde

ILUSTRACIONES: Laufer

ISBN: 978-84-948678-1-1

CÓDIGO BIC: TBC/YFH/5AF

MATERIA: INFANTIL

IDIOMA: ASTURIANO

RESUME: Nel reinu máxicu de Lendataria crez la desesperación. La lluna yá nun relluma: so lluz apagose y naide sabe bien por qué. «A ver, vamos solucionalo», se diz el conseyeru Amuletus, que visita’l rey y pide-y ufiertar un pagu pal que corrixa esti estropiciu. «¡Que daquién prenda una vela!, ¡que daquién encienda l’antorcha! Que vengan un bruxu o dos o cientu»:

Por mandatu del rei Migajo III, faese saber que quien torne’l brillu a la lluna nun perderá la cabeza será compensáu con cien monedes d’oru y tres mil de chocolate –ente otros pagos.

NOTA DE PRENSA

El reinu máxicu de Lendataria quédase sin la lluz… ¡de la lluna!
Por mandatu del rei Migajo III, faese saber que quien torne’l brillu a la lluna nun perderá la cabeza será compensáu con cien monedes d’oru y tres mil de chocolate

L’álbum infantil ilustráu Y de repente marchó la lluz… de la lluna, escritu por Xavier Frías Conde y dibuxau por Laura Fernández Arquisola (Laufer), llega a les llibreríes pa mirar si daquién ye capaz de correxir esti estropiciu, y ye que en Lendataria naide atina atopar el brillu del astru nel so cielu.

El llibru, editáu n’asturianu y castellán por Pintar-Pintar, llévanos pal reinu máxicu de Lendataria, onde la lluz de la lluna acaba marchar de sópitu… ¿pa no tornar? ¡Que nun se fale de viciu!, que nun nos atope’l mieu nin la desesperanza, porque’l lleal conseyeru Amuletus fizo un anunciu y fai saber que, por mandatu del rei Migajo III, habrá un pagu de monedes de chocolate y oru pal que recupere’l brillu llunar…

Y tamién con un percuriosu diccionariu que… Espera ahí, ¿nun taremos falando más qu’una sacaruela? Dexemos que’l escritor nos diga una migaya al rodiu del humor que percorre les páxines d’esti llibru. «L’humor, dende’l mio puntu de vista, ye crucial», diz Xavier, «ensin él, la vida nun tendría’l mesmu sentíu y, como la lliteratura ye vida, tampoco veo la lliteratura ensin humor».

Lo mesmu defende Laufer, la dibuxante, que destaca la presencia de pequeños personaxes secundarios (mira-y pal ratu, vixila-y a la curuxa que llevanta’l vuelu). Laufer tamién señala l’apaición d’un bruxu siniestru, envueltu na so prieta capa, que prestará ente grandes y menudos.

«L’humor ye perimportante», esplica Laufer, «y nel rellatu fici dalgún apunte graciosu con l’ayuda de pequeños personaxes que siguen l’historia de forma paralela, como’l ratu y la curuxa». En cuantes Xavier amiesta que yá vio a neñes y neños «reíse asgaya» coles sos histories y que –d’otra miente qu’asocede con dalguna otra gran cosa de la vida– «eso ye dalgo que nun pue pagase».

Tampoco pue pagase torna-y la lluz a la lluna –pero, oi, ¿nun nos prometió oru’l rei Migajo III?, entrugan dende Lendataria– o, voy decilo meyor, tan difícil como allumar una nueche escura como boca de llobu. «La nueche paecióme siempre que tenía una lluz especial, perguapa y misteriosa», intervien Laufer, «y aprovecho l’escuridá pa crear esi contraste con colores más animáos como’l mariellu, como’l roxu o como’l violeta, y asina acompañar esa maxa nel rellatu».

Y ye que, pa la dibuxante, foi senciellu entrar na historia, ya que presto-y dende la primera llectura. «Ná más lleer el testu de Xavier, paecióme máxicu; préstame l’idea de buscar la lluz de la lluna, ye como buscar un tesoru y eso me encantexa: nun me llevó ná meteme na historia», diz.

Nun ye país pa bruxos

Si l’humor y el color son dos elementos imprescindibles pa entender esti rellatu, tamién sonlo los sos personaxes, ente los que destaquen dos bruxos d’ocurrencies un tanto… desatinaes, un rei dalgo galbaniegu (siendo bonos) y una misteriosa muyer destinada a convertise na protagonista.

Porque nesti cuentu tampoco hai príncipes azules nin nobles caballeros entregaos a so reinu, o a una dama probemente dibuxada –fecha de tópicos enxareyaos–, sinón que… podría ser una heroína desconocida la qu’atopase la solución o… allumase’l misteriu. «Esti llibru tien dalgo de homenaxe a los héroes anónimos, que tán ende y pasen desapercibíos», escláranos l’escritor.

Ñacíu en Béjar, Salamanca, y residente en Toledo, Xavier Frías Conde collabora equí por segunda vez con Pintar-Pintar Editorial, dempués de facelo en 2011 con El caimán azul, dibuxáu por Daniel Montero Galán. «Y de repente… ye’l mio segundu llibru con Pintar-Pintar y espero que nun seya’l últimu. Ye una editorial que trabaya como poques la LIX [Lliteratura Infantil y Xuvenil]», termina Xavier, que fala «más de diez llingües» y yá publicó n’italiano, catalán, inglés o portugués.

Pela so parte, Laura Fernández Arquisola (Laufer) ye de Valladolid y trabayó enantes dibuxando cuentos interactivos, llibros de testo o revistes. Con Y de repente… se estrena nel mundu del’álbum infantil ilustráu, y fáilo xunto a Pintar-Pintar. «Entovía nun dibuxara un cuentu’n papel, polo que toi persatisfecha col resultáu», remata, contenta, l’artista.

Información sobro el autores

XAVIER FRÍAS CONDE

Llámome Xavier y vivo na Mancha, la tierra de Don Quixote. Cuido que daqué d’ellí se me contaxó. Mio ma ye asturiana y por eso amo Asturies. Doi clases na UNED, una universidá que tien la so sede en Madrid. Hai cuantayá qu’escribo, tola vida de fechu. Tengo publicao llibros en castellanu, gallegoportugués, asturianu, italianu ya inglés. Amás, préstenme los blogs. Ocúpome de dos: www.fabulandia.org y www.oreinodoscontos.com
Quedé finalista del Premiu Edebé de 2012 y fui ún de los ganadores del Frei Martín Sarmiento en 2016. Ente los mis títulos publicaos tán: Tres palomas y media, Las aventuras de Enrico Müller, Dadá o amigo invisíbel, Me pesa la cabeza, El caimán azul y munchos más.

LAUFER

Laufer (Laura Fernández Arquisola) ye de Valladolid, una ciudá na que nel iviernu siempres hai muncha borrina, daqué que-y presta a pesar del fríu. Dende pequeñina dibuxaba más que falaba, taba col lápiz a toes hores, y por eso cuando se fizo un mizcu mayor decidió dise a estudiar Belles Artes a la Universidá de Salamanca. Agora, pasaos unos cuantos años, vive en Barcelona, dende onde sigue viendo’l mundu con güeyos de neña dedicándose a lo que más-y gusta: ilustrar a tou color cuentos interactivos, xuegos, revistes y llibros de testu. www.lauferilustracion.com

--FICHA TÉCNICA--
Testos: Xavier Frías Conde / Ilustraciones: Laufer
Directores de la colección: Ángela Sánchez Vallina y Ester Sánchez
Formatu: 21 x 26 cm / Encuadernación: Tapa dura
Diseñu: Ester Sánchez
ISBN: 978-84-948678-1-1 / Páxines: 32
Edita: Pintar-Pintar Editorial / Primer edición: abril de 2018 
Imprime: Gráficas Summa (Asturies)
PVP: 4,95 €
Dossier de prensa: Pablo Fraile Dorado
Distribución / FlipBook / Vídeo promocional 
Galería / Primeres páxines / NOTA DE PRENSA.PDF
TIENDA ON-LINE
VER EDICIÓN EN CASTELLANO

<span id=»selection-marker-1″ class=»redactor-selection-marker» data-verified=»redactor»; id=»selection-marker-1″ class=»redactor-selection-marker»