Amorina motosierra

TESTOS: Daniel García Granda

ILUSTRACIONES: Andreu Llinàs Duran

ISBN: 978-84-93533-11-3

CÓDIGO BIC: YBC-5AF

MATERIA: INFANTIL

IDIOMA: ASTURIANO

RESUME: Y entós, Amorina enrabieyose, revolcose pol suelu, dio pataes, allaríos, y llanzó un zapatu al cielu. La neña negábase a ensayar, a tocar el vigulín, que ye un instrumentu fenomenal, estupendu, xenial, que suena ensin igual; pero que siendo asín nun ye pa toles neñes, nin tolos neños, como tampoco a un baillarín oblígase-y a pintar dibuxos o a preparar alzaparrilla. Amorina prefier aprender col güelu, qu’utiliza la motosierra igual de bien que l’esguil engata pol árbol. Y la neña garra la motosierra, l’enciende y cola so  «brm…, brm…, brm» vase como un rayu.

NOTA DE PRENSA

La neña Amorina enciende la motosierra para baltar les mires de los adultos
El nuevu álbum de Pintar-Pintar Editorial llega a les llibreríes en castellán y asturianu

L’álbum infantil ilustráu Amorina motosierra, escritu por Daniel García Granda ya ilustráu por Andreu Llinàs Duran, llega a les llibreríes llenu de la vida y dinamismu de la so protagonista, una neña que quier aprender a usar la mototosierra xunto al so güelu, dexando aparte’l violín impuestu polos sos padres.

El llibru, publicáu en castellán y n’asturianu por Pintar-Pintar, narra la hestoria de Amorina, una neña que, un pocu farta d’imposiciones, decide da-y una alternativa a los sos padres. Quiciabes nun aprienda a tocar el violín igual que Malikian, como ellos quieren, pero ta dispuesta a demostrar que ye un hachu usando la motosierra; ¡curiáu!, ¡que Amorina llega col so brm…, brmmmm…, brmmmbmbmbmbmbmb!…

«Amorina…», diz l’autor del testu, Daniel García Granda, «ye un tirón d’oreyes para dalgún padre un pocu o bien esnob, ente los que m’incluyo». «Agora yá nun se quier el trunfu del guah.e nel deporte, paez que tamién prúi que nos sala polímata: pintor, escritor, músicu, baillarín, actor, ximnasta…», añede Daniel, que carga con humor contra’l deséu de formar, en casa, a un Da Vinci en miniatura.

«Nun veo nada malu nes artes, al contrariu. El problema ye qu’igual a la neña gústa-y cómo canta un raitán y tu yá tas pensando en Mozart. Mete-y la motosierra al resultadismu adultu ye vital», sigue l’autor asturianu, que, a la hora d’escribir, inspírase nel fíu d’unos amigos.

«La hestoria vien d’un fechu real. El neñu d’unos amigos imploraba: “Castigáime colo que queráis, pero ¡nun me llevéis otra vegada a chelo!”. Esto foi l’el filón: un guah.e que vive nel mundu rural, interesáu pola música, pero más polos tractores. D’esti interés pola ferramienta surdió esta chanza personal. Gústenme les hestories irreverentes, fuera de lo ñoño», esplica.

«Sicasí», añede, «l’alderique ye vieyu: ¿qué pesa más?, ¿el gustu del neñu o la esperiencia del adultu? ¿Ye lícitu trespasa-y los nuesos gustos, por bien enriquecedores que paezan? Y ¿qué pasa col aprendizaxe alternativu, inolvidable, que tán nos ciños más cercanos, los güelos o la naturaleza? Si se tienen ende, paez acertáu buscar nellos otres formes de conocencia».

Una hestoria nacida n’asturianu

Pal autor foi difícil alloñase del relatu orixinal, yá que esti surdió n’asturianu; pero, en pidiendo ayuda «profesional y cercana» pa llevalo al castellán, quedó finalmente convencíu con dambes ediciones. «Nun taba contentu cola traducción, vía muncha perda nel léxicu, la fonética, l’humor…; anque, en pidiendo conseyu, creo que la resultancia ye finu y convincente», diz.

Dos ediciones nes qu’hai un denominador común, la simbiosis ente testu ya imaxes, que lleven al llector d’una a otra páxina de la mano de Amorina, siempres en movimientu, siempres activa. Primero, contra les imposiciones; y, depués, dueña del so tiempu llibre y felizmente autónoma.

Preguntáu sobro’l dinamismu del conxuntu, el ilustrador, Andreu Llinàs Duran, afirma que’l llector «estima que-y amuesen coses nueves en cada páxina». «Intenté variar los escenarios, fora de la casa, dientro; depués lo que la protagonista piensa o siente, lo que proxecta faer… La mio gran sorpresa foi que los editores diéronme absoluta llibertá», esplica, feliz, el ilustrador balear.

«Les ilustraciones d’Andreu», diz Daniel, «superen con muncho la imaxe de Amorina que yo tenía en mente. Son dinámiques, detallistas, metafóriques, rompedores. La imaxe y el testu cuerren al empar y potencien el perfil de los personaxes. Cada páxina ufierta un regalu visual impredicible».

Pela so parte, Andreu Llinàs, qu’empezó de neñu a lleer y coleccionar cómics, y que siempres s’imaxinó dibuxando les sos propies hestories, recuerda que se engabitó a los llibros ilustraos cuando nació la so fía. Con esta base de papel y tinta, «amás de col cine», ye posible que s’acentuara» el so gustu «poles narraciones que son visualmente dinámiques» –señala’l ilustrador.

Un llibru con vida

Amorina motosierra ye’l segundu trabayu de Daniel García Granda pa Pintar-Pintar Editorial, dempués de Versos de Asturias / Versos d’Asturies (marzu de 2017). L’autor, residente n’Uviéu, confiesa que tien «munches ganes» de viaxar col so nuevu llibru, de nun rindilo al polvu de les estanteríes» y tamién de llevalo a «presentaciones, llectures, cuentacuentos o visites a colexos».

P’Andreu Llinàs Duren, que collabora per primer vegada con esta editorial, pero que se dedica a la ilustración dende xunetu de 2012, dibuxar supon «una gran satisfaición». «Sobremanera», conclúi él mesmu, «pola sensación de crear daqué qu’antes nun esistía. Antes de faer estos dibuxos nin siquier esistíen na mio cabeza. El velos fechos sospriéndeme. De secute, formes que nin siquier albidraba que pudieren esistir acaben afiguraes nun papel. Ensin dulda, el procesu tien daqué máxicu».

Información sobro el autores

DANIEL GARCÍA GRANDA

«Soi de La Pola Siero (Asturies) y enxamás coyí un violín nin arrinqué una motosierra. Na actualidá vivo n’Uviéu. Ente tu y yo: encántenme los poemes y los praos. Trabayu de profesor en Mieres, anque nunca tuvi perru (y muncho menos correa). Ando poles aules d’un institutu espardiendo emociones ya idiomes. Nun bon cuentu y nun bon poema quiero enseñanza y humor, guapura y música. ¿Suénate?».

ANDREU LLINÀS DURAN

«Nací en Mallorca, pero agora vivo n’un pueblín de Panamá cola mio muyer, la mio fía y un gatu. Amás de dibuxar, cocino tolos díes y construyí una casina enriba un árbol. Amás de los mios llibros, tamién quiero faer un xardín. Dacuando escribo sobro’l mio trabayu nun blogue: andreullinas.com

--FICHA TÉCNICA--
Testos: Daniel García Granda / Ilustraciones: Andreu Llinàs Duran
Directores de la colección: Ángela Sánchez Vallina y Ester Sánchez
Formatu: 16 x 22 cm / Encuadernación: Tapa dura
Diseñu: Ester Sánchez
ISBN: 978-84-93533-11-3 / Páxines: 72
Edita: Pintar-Pintar Editorial / Primer edición: abril de 2018 
Imprime: Gráficas Summa (Asturies)
PVP: 4,95 €
Dossier de prensa: Pablo Fraile Dorado
Distribución / FlipBook / Vídeo promocional 
Galería / Primeres páxines / NOTA DE PRENSA.PDF
TIENDA ON-LINE
VER EDICIÓN EN CASTELLANO

<span id=»selection-marker-1″ class=»redactor-selection-marker» data-verified=»redactor»; id=»selection-marker-1″ class=»redactor-selection-marker»