03 - Talleres Pintar-Pintar

Talleres lliterarios Pintar-Pintar n’asturianu pa neños y neñes a partir de 5 años en collaboración cola Sociedá La Montera (Sama)

Tamos bien contentos d’anunciavos qu’a partir de febreru y hasta xunu, vamos entamar una collaboración cola Sociedá La Montera (Sama). En concretu, vamos facer un nuevu programa de talleres lliterarios empobinaos a los más pequeños. L’oxetivu ye averar a los neños y neñes la lliteratura infantil al traviés de xuegos y actividaes artístiques qu’estimulen el crecimientu personal y valores de diálogu y de respetu al otru y a la redolada.

Programa d’actividaes:

  • 7 de febreru: cuntacuentos + taller «Los páxaros»
  • 7 de marzu: cuntacuentos + taller de madreñes de magre «Lin xube a Carabín»
  • 18 d’abril: kamishibai + taller «Etenko y los patinos maraviosos»
  • 2 de mayu: cuntacuentos + taller de gyotaku «El poema que cayó a la mar»
  • 6 de xunu: taller de tapices «¡Qué tela más desigual!»

7 de febreru >
Cuntacuentos + taller «Los páxaros»

El día en que fai cuatro años, Leo recibe un regalu inesperáu, una guitarra que lu conquista y que lu va camudar pa siempres. Dende’l principiu, Leo nun apea l’instrumentu, prauticando pa convertise, de mayor, nun músicu formidable. Pero un accidente quita-y de sutrucu la maña y la ilusión. ¿Qué descubrirá Leo nel xardín, sintiendo cantar a los páxaros? ¿Será quien a tocar, ensin partitura, una melodía diferente?
Vamos facer plumaxes y aves inspiraos por «Los páxaros» con testos de Ivana Castañón Vázquez e ilustraciones de Emilia Conesa.

7 de marzu >
Cuntacuentos + taller de madreñes de magre «Lin xube a Carabín»

Depués d’esnalar y cayer, Lin xube a Carabín, an ca la güela, bien apegáu a la tierra y con sombreru vaqueru. En ca güelina hai de too, una tarta nel fornu —qu’entá tien qu’esperar—, madreñes, cacía, un gatu buxu y clares de güevu que naide pue tocar: ¡nun metas los deos! Afuera, si t’asomes, pues ver un prau con horru, y oveyes esponxaes, ¡y hasta pites revolviendo! ¿Sedrá Lin, antroxáu d’abixéu, a amarrales enantes que llegue la güela? Cuidáu con güelina, que ye como Flash, pero ensin traxe encarnáu. (Y con maxes a esgaya).
Tres la llectura del álbum ilustráu “Lin xube a Carabín”, con testos de Aique Fernandi e ilustraciones de Iranidis Fundora, enseñarémoste a crear la to propia madreña… ¡de magre!

18 d’abril >
Kamishibai + taller «Etenko y los patines maraviosos»

Etenko ye una neña que suaña con llegar a lo más alto patinando, faciendo reblincaes increyibles, casi volando, llixera, fuerte y segura mientres persigui los sos suaños de llibertá, nuna guapa metáfora. Compartimos la llectura d’esti álbum infantil illustráu escritu por Vicente García Oliva ya illustráu por Ester Sánchez col sofitu del nuesu kamishibai y aprovechamos les sos dinámiques imaxes pa trabayar la representación de la figura humana en movimientu. «Etenko y los patines maraviosos».

2 de mayu >
Cuntacuentos + taller de gyotaku «El poema que cayó a la mar»

Tres la llectura del álbum infantil ilustráu “El poema que cayó a la mar” d’Aurelio González Ovies y Ester Sánchez y comentar el procesu de creación d’un álbum infantil ilustráu, vamos realizar un taller d’estampación de pexes o gyotaku, una prestosa téunica d’impresión xaponesa. Pa facer esti taller vamos emplegar distintos moldes realistes a tamañu natural de distintes variedaes de pexes.

6 de xunu >
Cuntacuentos + taller «¡Qué tela más desigual!

L’araña Margarita sabe mover les sos ocho pates ensin dase a sí mesma un trespiés. Sabe cantar, baillar la danza del cisne y lleer de corríu, pero no que sí ye un fracasu, un verdaderu y llamentable fracasu, ye a la hora texer. Nesta sesión, non solo vamos descubrir cuál ye’l “problema” de l’araña Margarita a la hora texer, sinón que tamién ¡vamos deprender a texer como les arañes! Tres la llectura del álbum infantil ilustráu «¡Qué tela más desigual!» de Geovanys García Vistorte y Ana Zurita, pondrémonos nós mesmos, como l’araña Margarita, ¡a texer sobro’l nuesu propiu telar! Cada participante va recibir un telar (que va poder llevar al rematar el taller a so casa) sobro’l que vos enseñaremos a texer con cenciellos puntos, travesando les llanes de colores al traviés del lliciu.


Más información e inscripciones en info@lamontera.org / 985 69 39 88

Llibros y talleres Pintar-Pintar n’asturianu #LletresAsturianes

Deja un comentario

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Salir /  Cambiar )

Imagen de Twitter

Estás comentando usando tu cuenta de Twitter. Salir /  Cambiar )

Foto de Facebook

Estás comentando usando tu cuenta de Facebook. Salir /  Cambiar )

Conectando a %s