Candás va acoyer del xueves al domingu’l I Reguerada Fest, iniciativa del Gobiernu pa crear un espaciu d’alcuentru de la cultura en llingua asturiana. Van entamase más d’una docena d’actividaes estos cuatro díes y la Fábrica d’Ortiz va agospiar un Mercáu y Feria d’Empreses na que participen un total de quince firmes qu’empleguen l’asturianu, ente elles, Pintar-Pintar.

Dende Pintar-Pintar vamos participar coles nueses publicaciones n’asturianu nel mercáu na fábrica d’Ortiz y tamién vamos impartir el taller:

Con munchu bustu > bustos de magre nel Muséu Antón

La escultura ye l’arte qu’utiliza materiales macizos pa da-yos una forma tridimensional. Magar que nos primeros tiempos los materiales yeren la madera, el barru, la piedra y el mármol, darréu utilizáronse los metales y plásticos. A lo llargo d’esta visita, vas tener la oportunidá d’observar materiales y téuniques de delles de les escultures espuestes nel Muséu Antón, amás de conocer, en particular, la obra del escultor candasín Antonio Rodríguez García. Tres la visita y puesta de mancomún, vamos facer un taller de magre: vamos xugar y vamos trabayar con esti material partiendo dende un primer masuñáu y exercicios de contautu, pa comprobar la so densidá, resistencia, flexibilidá, plasticidá etc., hasta’l posterior llogru de formes cerámiques simples, como pequeños bustos de magre. 

¿Y por qué un taller de magre? 

Porque ye un material que presta especialmente al públicu infantil. 

Porque les “aiciones destructives pueden convertise en constructives” (P.Tilley) 

Porque potencia’l desenvolvimientu sensomotor (procesos de coordinación dinámica manual) 

Porque apurre esperiencies riques al desenvolvimientu perceutivu visual y táctil. 

*Pintar-Pintar collaboró col departamentu d’educación del Muséu de BBAA (2006 a 2021) y col Centru Niemeyer (2014 – 2020)
nel desenvolvimientu y diseñu del programa educativu para escolares, neños y families. 

Sábadu 5 de payares a les 17:30 h
Retirar invitación nesti enllaz