Pintar-Pintar Editorial | Blog

NOTA DE PRENSA

Una melodía diferente

«Los páxaros», d’Ivana Castañón Vázquez y Emilia Conesa, narra una hestoria de resistencia infantil escontra la calamidá

El día que fai cuatro años, Leo recibe un regalu inesperáu, una guitarra que lu conquista y que lu camuda pa siempres. El neñu nun apea l’instrumentu, y toca col envís de convertise en guitarrista cuando sía grande, pero un accidente-y quita de sutrucu la maña y la ilusión. ¿Qué descubrirá Leo, n’oyendo cantar a los páxaros nel xardín? ¿Atopará l’enfotu pa esfrutar, ensin más, de la música?

Escritu por Ivana Castañón Vázquez y ilustráu por Emilia Conesa, Los páxaros avérase a les nuestres aficiones dende una perspeutiva llúdica y fresca, ensin l’utilitarismu con que, davezu, s’envuelve aquello que más nos presta, quitándonos l’allegría puro del simple fechu de facelo.

«Podemos perder l’allegría con toles coses», esplica Ivana Castañón, «pero sobre too, pienso, coles coses que faemos cuando somos pequenos. La música, los deportes… si pensamos en que van ser un trabayu nel futuru… malo». Una idea que, nel llibru, s’amuesa de manera mui sutil.

Pero pa Leo, el protagonista de Los páxaros, perder parte de la so habilidá nun dexa de ser una desilusión. ¿Como s’encara dalgo asina? «Volviendo a les coses más fáciles», diz Ivana. «Pa nun atayanos, pa esfrutar de lo pequeno, ensin necesidá de más. Y ensin comparanos con otros. Son coses sencielles qu’a mi se m’escaecen tol tiempu, y cuando m’alcuerdo d’elles siéntome meyor».

L’orixe del cuentu tien que ver, tamién, con un procesu de recuperación, pues Ivana Castañón entamó la hestoria dempués de pasar la covid. «[Llueu de la enfermedá] sentíame cansada pa tou, asina qu’empecé polo más fácil: ver dibuxos animaos y lleer llibros para neños. Al poco escribí Los páxaros y fice llegar el cuentu a Ester Sánchez. A ella gustó-y y empezamos a trabayar».

Asina foi surdiendo esti llibru enllenu de color y de notes musicales, soníos qu’al iniciu esnalen como páxaros y llueu van cayendo como fueyes, pa terminar volando otra vuelta nuna sola melodía. Un mou d’esnalar que s’estiende a l’axuntanza ente’l testu d’Ivana y les ilustraciones d’Emilia, conectaes por un filu perfinu y doráu qu’orienta a Leo nos momentos malos y bonos.

«La técnica de grabáu d’Emilia ye bien especial», comenta Ivana. «Les ilustraciones falen d’ilusión, d’allegría, d’esperanza. Gústame pensar que’l testu tamién ye asina, allegre, como un xuegu de neños. Y que dambos casen bien. Creo que’l conxuntu tresmite bonos sentimientos».

Pa dar forma a les ilustraciones, Emilia Conesa usó téuniques diverses de grabao tentando de tresmitir los sentimientos del neñu. «Quería color: los páxaros coloríos lleven allegría. Les ilustraciones son llinograbaos, fago “sellos” y préstame xugar con testures y tintes», esplica Emilia.

«El testu gustóme ensiguida, porque taba viviendo una situación paecida col mi fíu, que taba enfermu: ¡les casualidaes de la vida! Préstenme los testos poéticos, enllenos de sentimientos y imaxinación. Tentaba de tresmitir los sentimientos del neñu, la poesía y sensibilidá del testu. Nun foi fácil».

Los páxaros ye’l primer llibru infantil d’Ivana Castañón Vázquez (Uviéu, 1995), gallardoniada nuna de les modalidaes del Premiu Asturies Xoven 2022 por Tiempos de penuria (Trabe), una obra onde axunta música, poesía y dramaturxa. L’autora xune’l so camín al d’Emilia Conesa, ilustradora belga fincada en Ribeseya qu’espublizara títulos como Les petits bonheurs, Quand je te vois y En balade dans l’alpage.

---

---

CUNTACUENTOS + TALLER

Cuntacuentos + taller «Los páxaros»
el domingu 25 de setiembre de 2022 a les 12:30 h

PRECIU de la actividá: 6 € (un adultu gratis por cada entrada infantil).

Materiales + un exemplar del álbum infantil ilustráu «Los páxaros» incluyíos nel preciu.

MÁS INFORMACIÓN