fbpx

NOVEDÁ: «Bruxa» de Pablo Fraile Dorado y Antonio Acebal

Bruxa

TESTOS: Pablo Fraile Dorado
ILUSTRACIONES: Antonio Acebal
ISBN: 978-84-125324-3-2
CÓDIGO BIC: YBC-5AF
MATERIA: Infantil
IDIOMA: ASTURIANU
 PÁXINES: 32
FORMATU: 21 x 26 cm
ENCUADERNACIÓN: tapa dura
RESUME: Yá ye la nueche de Samaín, y la bruxa Gorgona nun atopa la so escoba.

La bruxa, ensin la escoba,
nun pue volar pal pueblu,
nin asustar a los guah.es
nin esmellar calabaces
nin marchar con carambelos.

La bruxa Gorgooona
perdió la escoooba.
¿Ónnnde tará
la escoba de Gorgooona?

¿Coyísti-yla tu?

NOTA DE PRENSA

Una bruxa pierde la escoba na nueche de Samaín

Pablo Fraile Dorado y Antonio Acebal cuenten la so hestoria

Yá ye la nueche de Samaín, y la bruxa Gorgona nun atopa la so escoba. Ensin ella, Gorgona nun podrá volar pal pueblu nin esmellar calabaces nin marchar con carambelos. Asina entama’l nuevu llibru infantil de Pintar-Pintar Editorial: la hestoria d’una nueche d’encantamientos na que los muertos tornen a casa y los vivos prénden-yos veles, pa orientalos, y prepáren-yos dulces sobre bandexes de plata.

Con testos de Pablo Fraile Dorado ya ilustraciones d’Antonio Acebal, Bruxa ye un viaxe a un tiempu llonxanu, borrinosu, nel que se celebraba’l Samahin o Samaín, la festividá de orixe celta que señalaba’l final de les colleches y abrazaba la etapa más fría y escura del añu. Llueu vendría la cristianización de la fiesta, la so llegada a Estaos Xuníos y una torna con cambios, pero d’espíritu asemeyáu.

Nesi tiempu ente borrina, surde una bruxa encantadora y sobre manera espantible, la bruxa Gorgona, que dedica la nueche de Samaín a entamar trastaes a difuntos y vivos. Pero esta vez tien un problema, nun atopa la so escoba, y ensin ella ha dir d’un llau pa otru entrugando a collacios pa intentar atopala. ¿Quién aidará a Gorgona?, ¿quién intentará cafiala? ¿Ye tan mala como dicen o ye too una lleenda?

«Gorgona despriende tenrura, ye una bruxa de munches cares», esplica Antonio Acebal, l’ilustrador de la hestoria. «Ye una bruxa que dulda tol cuentu y que nun ye arquetípica, mala; pue resultar hasta traviesa. Despriende tenrura, y esta tenrura envuélvelo too: los personaxes qu’atopa, cómo va d’un sitiu a otru… Ye la conductora del cuentu. El testu ta fechu con munchu amor y los dibuxos nun podíen ser menos».

La tenrura de la bruxa va xunida al humor de los diálogos y a la escuridá de la nueche de muertos, ensin escaecer que’l públicu del llibru ye infantil y encara esta mecedura con naturalidá. Pal ilustrador, «nun fue difícil» entemecer humor y solombres, yá que navega bien «nos dos mares», como los propios neños.

«Amás», añade Antonio Acebal, «hai dalgo que xune estos dos mundos: la tenrura de la que falaba, y nel testu ta llatente, solo hai qu’atopala. De dalguna manera, soi quien a alcontrala, porque ye lo que m’esbarrumba y lo que me mueve. Paez una especie de manifiestu, pero ye real».

Xuego de lluz y solombra

Nel llibru, abonden les siluetes, los xuegos ente solombres y lluces, llevando a quien llee al pasáu, a les figures chinesques, a los principios del cine o a la puesta n’escena del teatru. «Les siluetes», diz Antonio Acebal, «tán tan recortaes qu’a veces son exentes, nun tienen nin escenarios, cuasi son elles les protagonistes. Cuanto más llimpies o exentes tán, más son… elles».

«Amás, l’escenariu, a min a priori estórbame. Quiero ver a los personaxes, llimpios, que los escenarios sían un marcu», continúa Acebal. «Ye más complexo que lo que digo, pero ansí lo fago. Otra cosa mui importante ye que tamién tán exentos, ta’l cielu y poco más, y árboles ente solombres».

Nesi marcu camina Gorgona, siempre en movimientu, entrugando a un sapu cosacu, a un espantaxu que quier ser poeta o a una antigua vecina (la pega Gargolafina). Too, baxo la cantinela de un grupu de pantasmes qu’arrabien a Gorgona; eso sí, dende lloñe y ocultos pola escuridá.

«El procesu pa dibuxalo too foi, n’apariencia, mui cenciellu. Lleía un párrafu y dibuxaba, a veces a llápiz y otres veces hasta artes finales, con rotulador. Xeneralmente, yera asina, un pequeñu párrafu y salía’l dibuxu. Intenté algamar el equilibriu ente colores brillantes y lluminosos cola naturaleza del cuentu, onde cuasi too pasa de nueche. Hai islles de lluz, sobre manera al final».

Nun sabemos qué piensa del llibru l’autor de la hestoria, Pablo Fraile Dorado, porque acaba marchar a escribir pa una viesca de lleenda, pero tará mui contentu, de xuru, coles ilustraciones y la edición. Según Antonio Acebal, la «comunión» ente testos y ilustraciones ye «total». «Suena mui tremendo, pero ye asina, nun atopo otra pallabra; por eso dibuxé hasta el final ensin tener el final na cabeza, dexándome llevar, como un guah.e. Los cuentos son curtios y hai que dexase llevar», diz.

Autores

PABLO FRAILE DORADO (Mieres, 1985) ye escritor y periodista. Dende’l 2017, espublizó los llibros infantiles Nueve cuentos azules, Arón el Gaturratón / Arón el Gatorratón, Tigre va de gala y La llingua de les xanes / El lenguaje de las hadas. Como periodista, trabayó en medios como Europa Press y elmundo.es. Güei, vive en Maliayo, cuida de les sos fíes y almuerza escribiendo (dacuando).

ANTONIO ACEBAL Cuento cuentos, hestories con colores y con llinies, fago dibuxos del mundu y pa tol mundu, el mundu de los neños del mundu. Cuento y recuento la hestoria de Sahar, de Bintou, la hestoria de Capiellina, Kalakamake, Arón o Gorgona. Cada páxina de color ye un mundu. Vivo de los cuentos que cuento o que me cuenten, y diéronme dalgunos premios de tanto dibuxar: Motiva d’Asturies, BIB de Bratislava. Y esta ye la mio hestoria en pequeño.


Pintar-Pintar Editorial / www.pintar-pintar.com
*Impreso en papel que procede de viesques que cumplen principios de xestión económica, social y ambiental sostenibles.


PRESENTACIONES

  • El sábadu 4 de xunu, Pablo Fraile Dorado firmará exemplares na caseta del Gremiu d’Editores d’Asturies na Feria del Libro de Madrid
  • El sábadu 11 de xunu a les 18:00 h, «Bruxa», cuntacuentos y taller con Pablo Fraile Dorado. Más información.
Editorial española especializada en literatura infantil y juvenil.
Entradas creadas 841

Deja un comentario

Este sitio usa Akismet para reducir el spam. Aprende cómo se procesan los datos de tus comentarios.

Comienza escribiendo tu búsqueda y pulsa enter para buscar. Presiona ESC para cancelar.

Volver arriba