Va tiempu

TESTOS: Elena García
ILUSTRACIONES: María Ortiz
ISBN: 978-84-121182-7-8
CÓDIGO BIC: YBC-YNL-5AH
MATERIA: INFANTIL
IDIOMA: ASTURIANO
RESUME: Piensa na to infancia, ¿qué recuerdes de va tiempu? Pues cerrar los güeyos un segundu. Esti llibru ye un viaxe como’l que te proponemos, una ventana en color a los branos colos güelos, a los estivos pa moyar pan en chicolate o pa xugar con arcos y fleches, pa dir a la yerba (y nun segar muncho) o pa pañar ablanes y peres, un espeyu onde la señardá nun tien cabida pero onde tu, llector, pequeñu o grande, vas vete reflexáu sobre manera, porque la lluz, daquella, paecía nuevo y nesti álbum reverdexa.

NOTA DE PRENSA

Un viaxe ensin señardá a los felices branos colos güelos

«Va tiempu» ye una ventana, enllena de color, a los estivos de l’autora nel pueblu de so ma

L’álbum infantil Va tiempu, escritu por Elena García ya ilustráu por María Ortiz, ye un viaxe ensin señardá a los branos d’Elena nel pueblu de so madre, onde sos güelos la cuidaben y la lluz paecía nuevo, estivos pa xugar con arcos y fleches, moyar sopes de pan nel chicolate o pañar ablanes, peres y nueces pente la viesca.

Editáu por Pintar-Pintar, Va tiempu ye una ventana en color a la infancia d’Elena García, que cuenta cola collaboración de María Ortiz pa redibuxar recuerdos y evocar afeutos, amás de texer nueves complicidaes colos llectores, pequeños y grandes, que van vese espeyaos sobre manera nes páxines del llibru.

Una obra na acordanza d’un tiempu feliz pero que nun se pierde na señardá, abellugando los bonos recuerdos y dexando espaciu pa los que tean por llegar. Esta forma d’acercase al testu «foi daqué que vino solo», asegura l’autora: «Escribí dando voz a aquella guah.a que vivió tolo contáu equí [nel álbum], reflexando, espero, l’amor que siento pola mio familia y obviando les quexes que pude facer nel momentu».

«El llibru», añade Elena, «ta basáu nos branos que pasaba nel pueblu de mio ma, Irrondo de la Folguera, en Cangas del Narcea». «[Lo meyor de dir elli], dende llueu, foi pasar tiempu con mio güela, mio güelu y mio prima. Col resto de la familia tamién, nun se me vayan enfadar, pero sobre manera con ellos trés», afirma.

De los branos nel pueblu, tamién destaca «la cercanía cola xente», «la llibertá de movimientos» o eso de que los díes paezan durar más («n’iviernu ye otra hestoria», matiza). De toes maneres, refuga la «idea bucólica» de la tranquilidá del pueblu, onde, recuerda, «hai ruíos, despiértante los gallos, los perros lladren y los tractores faen muncha bulla». «Que llueu lleguen les quexes», añade Elena, non ensin humor.

Pela so parte, la ilustradora del álbum, María Ortiz, nun tuvo esa cercanía col campu de neña, pero va unos años empezó a dir cada branu al pueblu d’una amiga, onde l’acoyeron «como a una más», una rellación direuta colo rural que s’aprecia nel álbum y el so color. «Los paisaxes qu’evoca Elena toi viviéndolos yo n’actualidá. Ñací n’Uviéu, como mios padres y mios güelos, polo que nunca fuimos a descansar al pueblu, pero cuando lleía’l cuentu d’Elena, pensaba direutamente nos mios últimos branos».

«Una de les coses que-y gustaben a la editorial, a la hora d’escoyeme pa esti llibru, yera l’usu que-y doi al color», diz María, «queríen facer una hestoria visualmente atrayente pa que los neños s’identificasen con ella». «L’usu del contraste, del verde d’Asturies y l’apuesta por caltener una escena harmónica, pa que cada detalle tuviera la mesma importancia, foi ún de los requisitos que me marqué a la hora d’ilustralu», asegura.

El primer llibru de les autores

Va tiempu, amás, supón el primer acercamientu de les autores a la LLIX, lo que-y dai un matiz especial a la obra. «Esti llibru naz del enfotu de la escritora Begoña Juarrero Rodrigo, qu’empetóse en que yo tenía qu’escribir un llibru. Rematólo una alumna que me fizo un cuadernu perguapu pa escribir los mios cuentos. Yo dixi-y que nun escribía y ella contestóme que tenía que facelo», comenta Elena García, que tamién da clas.

D’esti doble impulsu, vien un álbum que, a la vez, sirve d’homenaxe a la familia d’Elena y tamién a l’Asturies rural, «dalgo clave pa entender el nueso país», apunta l’autora. «Amás, [el testu ye] n’asturianu, ¿qué más puedo pidir? Val, yá que tamos, ¡que se llea y que guste!», acaba Elena, qu’espera’l llibru con ganes.

Mientres, María Ortiz pasó per dellos estaos d’ánimu antes de tener les riendes del proyeutu. «Siendo’l primer álbum qu’ilustro, los mieos ya inseguridaes siempres apaecen. Asina y too, una vez fecha la tercera ilustración y definíos los personaxes, el remangu y l’optimismu [ficieron] qu’esti trabayu fuera una pasión envede un encargu», diz la ilustradora, «una puerta mui grande pa pensar de verdá que me pueo dedicar a esto».

«Siempres me dediqué a la ilustración en paralelu a otros llabores y nunca lo vi como una opción a la hora de trabayar», recuerda María Ortiz. «Ilustrar esti llibru faeme creyer y tener esperances en que pueo siguir dedicándome como profesional a daqué que m’apasiona». Con Va tiempu, dende llueu, va camín de llogralo.

*El nuevu álbum va tener edición física y dixital n’asturianu y solamente dixital en castellán.

Información sobro el autores

FICHA TÉCNICA

Va tiempu

Testos: Elena García
Ilustraciones: María Ortiz
Directores de la colección: Ángela Sánchez Vallina y Ester Sánchez 
Formatu: 21 x 22 cm
Encuadernación: Tapa dura
Diseñu: Ester Sánchez 
ISBN: 978-84-121182-7-8
Páxines: 48
Edita: Pintar-Pintar Editorial
Primer edición: ochobre de 2020 
Imprime: Gráficas Summa (Asturies)
PVP: 4,95 €
Dossier de prensa: Pablo Fraile Dorado
Distribución: consultar nesti enllaz
Primeres páxines

Descarga equí esti dossier de prensa (.pdf)

Va tiempu
¡Narráu por Elena García!

<span id="selection-marker-1" class="redactor-selection-marker" data-verified="redactor"; id="selection-marker-1" class="redactor-selection-marker"

Edición impresa 4,95 €
(Cola ayuda de la Conseyería de Cultura, Política Llingúística y Turismu del Principáu d’Asturies)

FlipBook n’asturianu 5,99 €