Termina’l branu y mientres dalgunos y dalgunes entaínen a solmenar el sable de les sos cabeces, rescatar mochiles y afilar llapiceros, nós damos los últimos toques al llibru col que vamos cerrar 2019: Lin quier esnalar, que como otres vegaes va editase n’asturianu y tamién en castellán y va tar nes llibreríes a tiempu para formar parte de la carta a Les Sos Maxestaes los Reis. D’Oriente, entiéndese.

Lin quier esnalar

Testu: Aique Fernandi / Ilustraciones: Iranidis Fundora

AIQUE FERNANDI ye llicenciáu en Filoloxía Inglesa. Nació en Sotrondio en 1967 y depués de vivir en Sama, L’Entregu, Galicia, Estaos Xuníos, Dinamarca, Xapón o Méxicu, vuelve a Llangréu, onde fai de profesor, normalizador, traductor y escritor. Tornó dos obres de teatru del inglés al asturianu: Lo que vio’l mayordomu de Joe Orton, y La importancia de ser Severu d’Oscar Wilde, amás d’esparder delles poesíes per revistes del país y ganar dalgún premiu colos sos cuentos, unu de los más importantes l’últimu Premiu María Josefa Canellada de Lliteratura Xuvenil por Invisible.

IRANIDIS FUNDORA ye una destacada pintora, diseñadora gráfica y grabadora cubana en que la so obra predominen fundamentalmente la ilustración de llibros, cartelos y portaes de discos.

Naz nel añu 1979 en Santa Clara, y gracies a la so madre desenvuelve la vocación pol arte y la pintura. Nel añu 1998 graduase na Academia d’Artes Plástiques Oscar Fernández Morera, en Trinidá, Santi Spíritus, na especialidá de pintura. Tamién realizó estudios n’Edición d’Arte na Escuela Superior de Arte d’Uviéu, na especialidá de Diseñu Gráficu ya ilustración.

Collabora per primer vegada con Pintar Pintar nel llibru infantil n’asturianu Un monstruu ensin corazón, con testu de la escritora y profesora asturiana Maria Luz Pontón. Nesta ocasión, tenemos la suerte de que Iranidis ta faciéndonos les ilustraciones en base a grabaos que s’ellaboren nel Taller esperimental de gráfiques de L’Habana onde la ilustradora trabaya d’aprendiz anguaño.

Lin quier esnalar ye el primer cuento, y esperemos que non el últimu, que tien por protagonista a Lin, un rapacín un pocu traviesu, que nesta aventura va desafiar la lley de la gravedá.

*Semeyes del procesu de trabayu para la edición del llibru Lin quier esnalar realizaes por Iranidis Fundora.