Candás va acoyer del 14 al 16 de payares eI Reguerada Fest 2025 iniciativa del Gobiernu pa crear un espaciu d’alcuentru d’empreses, lliteratura, música, artes visuales y escéniques y gastronomía en llingua asturiana.
Dende Pintar-Pintar vamos participar coles nueses publicaciones n’asturianu nel mercáu na fábrica d’Ortiz y tamién col taller: «Breve inventariu de los seres escondíos» col so autor Miguel Rodríguez Monteavaro.
Nél vamos adentranos nel mundu de los picocos, de los cavlolillos, de les camarsopes y de Pistacho, unos animales que nun existen, anque bien podríen facelo.
Nesti taller, dirixíu a neños y neñes d’a partir de los 6 años, l’oxetivu ye disfrutar de la llectura y dexar la mente imaxinar una realidá palarela na que los seres encondíos se materialicen en forma de dibuxos.
*Cada participante recibirá un exemplar del llibru.
Retirar invitación nesti enllaz
Resume:
Breve inventariu de los seres escondíos ye un viaxe a mediu camín ente la ciencia y la imaxinación, onde neñes y neños faen d’investigadores de verdá. Porque namás ellos, llibres de prexuicios, tienen capacidá pa ver más allá de lo que les persones adultes pueden midir o demostrar. Nesti llibru, Miguel Rodríguez Monteavaro recueye con humor y con un rigor fantásticu un catálogu sorprendente de criatures invisibles pa la xente mayor: dende dragones que beben lleche de vaca hasta lluces qu’anden, pasando per seres marinos de piedra o animales que nacen de los árboles. Caún ta descritu según les normes de les Ciencies Pequeñes, col so hábitat, costumes y formes d’alimentación. Juan Torres ilustró diez d’estos seres escondíos. Los demás queden pa la imaxinación: al llau de la so descripción hai una páxina en blanco pa que puedas imaxinalos y dibuxalos o pintalos. Un tratáu de «criptozooloxía infantil» que nos recuerda que la naturaleza ye muncho más fonda y máxica de lo que creemos, y que merez ser estudiada, comprendida y, sobre too, respetada.
Ficha técnica:
| Testos: Miguel Rodríguez Monteavaro | ISBN: 979-13-990269-1-7 |
| Ilustraciones: Juan Torres | Númberu de páxines: 64 |
| Formatu: 21 x 26 | Idioma: asturiano |
| Encuadernación: rústica cosida | Añu d’edición: 2025 |
Pintar-Pintar Editorial | Blog 
Deja un comentario