El mundu secretu que namás ven los neños
Breve inventariu de los seres escondíos, de Miguel Rodríguez Monteavaro y Juan Torres
Nota de prensa
Una piedra que llate, un ave que camina sobre l’agua, un dragón qu’escupe agua en cuenta de fueu, criatures que viven colgaes nel cielu o s’escuenden nel fondu de la selva. Breve inventariu de los seres escondíos, obra firmada por Miguel Rodríguez Monteavaro y ilustrada con aciertu por Juan Torres, nun ye un simple catálogu de criatures fantástiques: ye un tratáu poéticu-científicu sobre lo que la infancia ve y que los adultos yá nun son capaces de percibir.
Espublizada por Pintar-Pintar Editorial, esta obra singular preséntase como una «criptozooloxía infantil», un compendiu de seres invisibles pa la vista adulta pero dafechu reales y documentables según el métodu HACA (Hábitat, Comportamientu, Alimentu), desarrolláu —o quiciás inventáu— pola mítica Dra. Oriana di Pesto. Les páxines alternen descripciones minucioses con ilustraciones vibrantes y espacios en blanco que conviden al llector a intervenir, dibuxar, imaxinar y completar esi mundu.
D’una xeneración a otra
Rodríguez Monteavaro esplica’l xerme d’esti proyeutu con una claridá emocionada: «Dende que nació Orión, el mio fíu, la mio mentalidá adulta conectó cola mio mentalidá infantil que, a pesar de que nunca la olvidara, sí taba un poco arrinconada».
Esa conexón ente xeneraciones traviesa tola obra como una llinia xenética de la imaxinación: lo que’l güelu tresmitió al autor —nomes antiguos d’aves, accidentes xeográficos, plantes— canalízase agora nel so fíu. El bestiariu conviértese asina nun vehículu lúdicu pero cargáu de sentíu, una manera d’entender el mundu como una cadena cultural na que cada eslabón tien la responsabilidá de caltener y dar forma nueva al heriedu.
«Fíxome comprender que nun soi más qu’un esllabón de la cadena cultural histórica: si mio güelu me lo tresmitió a mi, yo tengo que tresmiti-ylo al mio fíu».
Lo que se ve colos güeyos abiertos de la infancia
Nel testu treslluzse una crítica sutil a la mentalidá adulta, marcada pola obsesión de cuantificalo too y por una lóxica qu’esclúi y aparta lo invisible o lo que nun se pue midir. Polo contrario, les neñes y los neños —verdaderos científicos de les «Ciencies Pequeñes»— cunten con una mirada ensin prexuicios, capaz de convivir cola estrañeza ensin pidi-y esplicaciones. «El mundu infantil nun tien llendes y ye infinitamente más ampliu que’l nuestru. Cuando yera pequeñu pensaba que yo podía ver coses que mios padres nun podíen y trataba d’esplicá-yosles de la manera más razonada que podía».
La premisa del llibru ye clara: esiste una biodiversidá paralela que namás se-y revela a quien nun perdió entá la capacidá d’asombru. Por eso, munchos de los seres escondíos —como’l picocu, el musín, la camarsopa o l’entrañable Colorín del ríu Naranxa— interactúen esclusivamente con neñes y neños.
Imaxinación con métodu
Lloñe del caos, Breve inventariu plantega un sistema estructuráu d’observación: el métodu HACA, que permite clasificar cada criatura según el so hábitat, comportamientu y alimentu. Ye un guiñu a la divulgación científica tradicional, pero con un xiru radical: equí les fontes nun son biólogos de llaboratoriu, sinón escolines y escolinos, dibuxos infantiles, testimonios orales y fantasíes compartíes.
El tonu paródicu convive con una fonda inquietú ecolóxica. Cada ser escondíu cumple una función simbólica dientro del so ecosistema, y el llibru llanza una premisa bien clara: «Nun podemos vivir sin una relación equidistante cola naturaleza. Nesti llibru propónense realidaes animales que nun son reales, pero que podríen selo, igual que los organismos que tovía nun fueron descubiertos y que de dalguna manera tán sosteniendo la vida na tierra como lo faen los humanos. Hai una clara conciencia ecoloxista nesti trabayu, pero tamién artística, xeográfica y llingüística. La ideoloxía d’esti bestiariu ta marcada pol respetu a les diferentes formes de vida del planeta, el conocimientu del nuestru entornu y l’apertura de mente necesaria pa encaxar too aquello diferente a nós».
L’arte de ver lo que nun se ve
Les ilustraciones de Juan Torres xueguen nel borde ente lo real y lo onírico. Cada figura paez atrapada nesi instante en que la imaxinación toma forma pero entá nun se torna definitiva. «Intentando pensar como un neñu», esplica Torres, afrontó’l trabayu dende la anatomía, simplificando formes reales hasta dar con criatures qu’habiten a mediu camín ente la zooloxía y la fábula. Confiesa que la so favorita ye’l Cotoploclu, una mezcla ente réptil y felín capaz de mutar el so ADN: «Yera un retu que dexaba crear un bichu bien peculiar… tamién el más difícil, inspirador y la mio criatura favorita».
El resultáu son seres que tán ente la ciencia y el mitu: criatures que nun podríen esistir, pero que, por dalguna razón, ún sospecha que sí esisten.
Un llibru que se completa al lleese
Ún de los aspectos más singulares del llibru ye la so invitación clara a participar. Delles páxines tán en blanco pa que los llectores, sobre too los más pequeños, dibuxen los seres non ilustraos. Pa Rodríguez Monteavaro, esta apertura nun ye un simple detalle decorativu, sinón un xestu pedagóxicu y políticu: «Nesti inventariu de seres proponemos tolo contrario: non solo ta permitío dibuxar, sinón que ye casi obligatorio que cada persona que cueya esti llibru lu tome como propiu y lu faga un oxetu singular».
El valor de lo inventao
Breve inventariu de los seres escondíos inscríbese nuna llarga tradición de bestiarios ficticios —de Pliniu a Borges, de JK Rowling al Animalariu universal del profesor Revillod —, pero failo con voz propia y una singularidá remarcable: la so hibridación de lliteratura infantil, activismu ecolóxicu, divulgación científica y estética etnográfica. Hai, amás, un valor llingüísticu evidente. L’usu natural del asturianu, non como un elementu exóticu, sinón como llingua viva de tresmisión cultural, refuerza’l calter telúricu y local de la obra. Y dende esi raigañu local, la propuesta ábrese a lo universal.
Esti llibru nun enseña a clasificar monstruos, sinón a mirar con otros güeyos. A xugar colo que paez imposible. A aceptar que, quiciás, el mundu seya muncho más anchu y misteriosu de lo que la razón adulta s’atreva a reconocer.
Autores
Miguel Rodríguez Monteavaro (Bual, Asturies, 1990) ye poeta, músicu y doctor en llingüística asturiana pola Universidá d’Uvieo. Publicó ocho llibros de poesía, ente los que pueden señalase Trenta razois pra nun medrar (Trabe, 2010), Cortar pescado en Manila (Afundación, Xunta de Galicia, Centro PEN de Galicia, 2024) y Al disparar nunca parte (Trabe, 2025). A partir de los sos poemarios A lluz, Orión e a nova lluz (Disbauxa, Barcelona, 2024) y Cortar pescado en Manila desenvolvió unes performances de poesía A/V homónima nes que destaca la oralidá sobre una base sonora y visual. Tamién ganó dellos premios lliterarios, concursos públicos y residencies como l’Asturies Joven de Poesía (2019), Residencia Artes Escéniques Laboral Ciudad de la Cultura (2022), Premiu Xuan María Acebal (2024) y Premiu de poesía Afundación (2024), ente otros. Amás en 2023 y en 2025 consiguió una Ayuda a la Creación Lliteraria del Gobiernu del Principáu d’Asturies y en 2023, el primer puestu na categoría de poesía nes Subvenciones a la Creación del Ministeriu de Cultura d’España.
Rodríguez Monteavaro ye coordinador y director del Ciclu de Poesía QED y del Festival de poesía escénica Voces del fornu, dambos n’Uvieo. Los sos poemes, escritos orixinalmente en gallegu y n’asturianu, fueron traducíos y publicaos en más d’una decena de llingües. La so esperiencia como poeta inclúi la so participación en festivales y recitales de poesía n’España, Polonia, México, Honduras, India, Grecia, Croacia y Kenia, ente otros países.
Juan Torres.
Graduáu n’Animación pola U-tad (Universidad de Tecnología y Arte Digital)
Resume
Breve inventariu de los seres escondíos ye un viaxe a mediu camín ente la ciencia y la imaxinación, onde neñes y neños faen d’investigadores de verdá. Porque namás ellos, llibres de prexuicios, tienen capacidá pa ver más allá de lo que les persones adultes pueden midir o demostrar. Nesti llibru, Miguel Rodríguez Monteavaro recueye con humor y con un rigor fantásticu un catálogu sorprendente de criatures invisibles pa la xente mayor: dende dragones que beben lleche de vaca hasta lluces qu’anden, pasando per seres marinos de piedra o animales que nacen de los árboles. Caún ta descritu según les normes de les Ciencies Pequeñes, col so hábitat, costumes y formes d’alimentación. Juan Torres ilustró diez d’estos seres escondíos. Los demás queden pa la imaxinación: al llau de la so descripción hai una páxina en blanco pa que puedas imaxinalos y dibuxalos o pintalos. Un tratáu de «criptozooloxía infantil» que nos recuerda que la naturaleza ye muncho más fonda y máxica de lo que creemos, y que merez ser estudiada, comprendida y, sobre too, respetada.
| Testos: Miguel Rodríguez Monteavaro | ISBN: 979-13-990269-1-7 |
| Ilustraciones: Juan Torres | Númberu de páxines: 64 |
| Formatu: 21 x 26 | Idioma: asturiano |
| Encuadernación: rústica cosida | Añu d’edición: 2025 |
Más conteníos:
Pintar-Pintar Editorial
Fomentando la creatividá y l’amor pola llectura dende 2005. El nuesu llabor editorial foi reconocíu, ente otros, col Premiu Nacional a la Edición de los años 2008, 2012 y 2014. Pintar-Pintar tamién ye una xestora d’actividaes educatives.
- www.pintar-pintar.com
- pintarpintareditorial.blog
- Catálogu online de publicaciones
- Llibros n’asturianu Pintar-Pintar
Pintar-Pintar Editorial | Blog 
Deja un comentario