Escoyemos esti vienres 3 de mayu, nel que celebramos el Día del Llibru Asturianu, pa informavos de les nueses próximes publicaciones infantiles n’asturianu:
- el poemariu Versonaxes de Aurelio González Ovies, coles ilustraciones de Ester Sánchez, y
- Cuatro esquinines de Pepe Monteserín, ilustrau nesti casu por Job Sánchez.
Escoyemos tamién esti día pa manifestar que la bona o mala salú de la lliteratura n’asturianu depende non solo de que tengamos bonos escritores _que los hai_, que cultiven con amor, por amor, esta llingua, sinón d’otres munches circunstancies: l’estrañu estatus xurídicu de la nuesa llingua, que nesta casa denominamos «síperonón»; el de los profesores que lu enseñen; la so presencia nes biblioteques públiques y escolares; la so visibilidá nes llibreríes y nos medios de comunicación; la delicada salú de quienes la editen; el grau de respetu que-y rindan les instituciones públiques de la tierra, non vamos pedir fuera lo que nun ye dientro…
Quitemos les oreyeres que nun nos dexen ver el conxuntu y atopemos soluciones ya.
Porque son malos tiempos pa la llírica. Peores, si ye minoritaria. Pésimos, si ye n’asturianu.
Pintar-Pintar Editorial | Blog 
Deja un comentario